Maantana muxuu Dalkeennii ku suganyahay, maxayse Dadkeennii ku suganyihiin, aheey waheey Soomaalaay, ma sharaftii iyo Awooddii aannu lahayn, Ilaahay s.w.t. ayaa Awood iskalehe, ayaa maantana gumayste foolxun ka talinayaa Waddankeennii Hooyo ee Xalaasha ahaa, xasuuq ba' anna ku hayaa Shacabkeennii.

Taa waxaa ka sii daran farxad ay farxaan Ummaddayada daayoo, murugo iyo macaluul ayeey meel la jiifaan.

Soomaalaay walaalayaal maxaad damacdeen?, ma sidan ayaad naf mooddeen?, ma gumaysinnimo ayaad door biddeen?, ma is dilkan ayaad wanaag mooddeen?, ma mindi, mindi ku taagtan ayaad go'aansateen?.

War Ilaahay s.w.t. ka baqda oo heshiiya, waad u jeeddaan sida la' idiinkaga faa' iidaysanayo, oo dhexdiinna la' isugu kiin baabbi' inayo, Soomaalaay idinkaa walaala ah oo wada dhashaye isku Diin, isku Af iyo isku Dhaqanba ahe, ma sharaftiinnii ayaad kolba hoos u sii dhigaysaan.

Allaah s.w.t. ayaa Wayne oo Awood lehe, iska daaya danahiinna' aad fiirsanaysaan, ee u dhaqaaqa danaha guud ee Shacabkayaga ee masaakiintana ah, iyo kuwa ku dhex dhasheen dagaalladii sokeeye, illaa haddana arka cadaw xasuuq ba' an ku haya, oo aanay waligood arag wax la yidhaahdo Qaran nabad-gelyo leh.  

Soomaalaay, shacabkeennii ma noola, waxay noqdeen kuwa lagu xasuuqay hooygoodii, kuwo badaha ku dhammaaday, kuwo xabsiyada Adduunka ka buuxa iyo kuwo dhaqan iyo Diinba rogmaday, ee isu naxa illeyn Dawlad la' aan, Dawlad xun ayaa dhaanta eh.

Soomaalaay, haddaad isugu faaneysaan anaa kaa awood wayn, waad ogtihiin oo Soomaali kala awood waynaan wayday!.

Wax kalana ma' aha ee waa cadawgiinna oo marba dhan idiin jahaynaya, ee walaalayaaloow waxaa awood lagu helaa, markaad isku duubnaataan oo aad dhan uga soo wada jeedsataan cadawgiinna, taa ayaa la dhihi karaa awood, laakiinse intaad kala daadsantihiin, awooddiinna ayaa sidaa lagu kala jajabinayaa ee oogaada walaalayaal.

Hadda iyo dan, inshaa' Allaahu, sannadkan sannadkiisa waxaannu rajaynaynaa, inaannu ku wada ciidno Waddankeennii Xalaasha ahaa iyo Caasimaddeennii Muqdishu oo Calankeennii Buluugleey ka lulanaaya inshaa' Allaahu, aamiin.

Taana waxaa lagu gaadhi karaa, idinkoo Ilaahay s.w.t. u soo noqdo, tawbana yidhaahda, isu wada tanaasula, isna wada cafiya, wax wada qabsadana.

 

Kowda Luulyo liibaannay ** ludhkiina na daayaye

Waa maalintaan lammaannay ** cadawna lugta gooynaye

Labaannu noqonnayoo ** cadawgiina laabta ka laadnaye

Waa maalintaan labadeenna gobol ** lib xareed leh wadaagnaye

Waa maalintaan labadeenna gobol ** lixaadka isu geeynaye

Waa maalintii gobolka koonfureed ** dhaliyeen goolkiiye

Waa maalintii gumaystaha gaboobiyo ** gorfanihii garab gawraceene

Nacab uu ku gubtee ** gacalna ay ku farxeene

Guusha wacan ay heleenna ** waa Calan guudka saarane

Waa mid lagu wada gartoo ** laga wada lulay Caasimaddeenna

Laabtu waxay tabaysaa ** Calanka laydhiisiiye

Laabtu waxay tabaysaa ** Qarankii la lunshaye

Laabtu waxay tabaysaa ** leexada lixdankiiye

Laabtu waxay tabaysaa ** labadii is raacdaye

Laabtu waxay tabaysaa ** xeerkii sharafta badnaaye

Laabtu waxay tabaysaa ** deegaankaan lahayne

Laabtu waxay tabaysaa ** lama huraan Muqdisho e

Laabtu waxay tabaysaa ** lahaansho sharafeede

Laabtu waxay tabaysaa ** xoogagii laxaadka lahaaye

Laabtu waxay tabaysaa ** liishaan lagu daruuro cadawguye

=============================================

 

Calankaan mahadinnoow ** xalaasha cirka u ekaayoow

Xadgudubkii laguu gaystayna ** xaalbaannu kaa siinnaye

Adna xeesha hawleed ** qorshe noo xarriiqoo

Aqoon ku xirfadeeyoo ** wax soo saarka xoojiyoo

Majaraha xadeeyo ** hab wanaaggaagu waa xaqe

Horaannu kuu xulannay ** mabda' aaga xalaasha ahe

Xeer nooga yeeloo ** xilkas caddaalad dhowriyo

Rag iyo Dumar la xulay u sooca oo ** xukunka u dhiiba oo

Xilkasnimadaada adag iyo ** xirfaddaada nagu daaddihi

Midka kaa xigtaysta gumaystaha ** xaasidnimo ugu geeya xogtaada

Xooggiyo wadnaha jar ** ha uga turin xabaashana ku rid

Yaanan xaqa dadwaynaha ** xaaraamiyuhu cunin

Kanaa i xigee hor mari iyo ** is xigsigu ha baabba'o

Xuma wade dib u socod ah ** qabiilna ku xarragooda

Af miishaar xakama galiyoo ** naga wada xaaq dhammaantood

Xoogsatada hor socodka Soomaaliyeedoow * xilli waxaynu joognaa

Xiisad dagaal loo xanjeersadoo ** xarbi la' isu taagoo

Xabbaddii joogtada ahayd iyo ** xasuuqii laga dhiidhiyay

Xaq beey u leeyihiin Shacabkayagu ** ineey xornimo dib u hantaan

Ninka xishoonayoow ** waa kee oo waa kuma?

Waa hubka inuu xirtaayoo ** xoogga dhinac ka raacaa

Xorriyaddana difaacaa ** xoola iyo nafba u huraa Calankiisa

==============================================