Thursday, July 10, 2008 -  275 waa xubnaha ay ka kooban yihiin baarlamaanka Soomaaliya ee lagu soo dhisay dalka Kenya kadib shirkii dib u heshiisiinta Soomaaliyeed ee  halkaa ka soconayay mudada badan, xubnaha Baarlamaanka Soomaaliyeed ayaa waxaa lagu soo xulay qaabkii ahaa 4.5 ee dhaliisha badan xambaarsanaa, Hadaba si kastoo ay ahaataba waxaa halkaa laga raadinayay xalka umadda Soomaaliyeed oo in badan murugsanaa madaxa iyo majaha isaga  laabnaa.

Hadaba xubnahaas waxaa soo xulay oo isu soo shaandheeyay qab qablayaashii dagaalka iyo duqow dhaqameedyo u dhaga nugul iyaga waxaase dhisidoodii dabadeed la guda galay xulashaddii loo samaynayay qofkii guddoomiye u noqon lahaa, iyadoo markaana beel ka mida beelaha loo kala saaray 4.5 loo sii asteeyay qabashadda xilkaas isaga ah waxaana durbadiiba muuqanaysay in ay dhexdooda kala shaandheyn ka socotay.

Hadaba doorashaddii afhayeenka baarlamaanka iyo ku xigeenadiisii dabadadeed waxaa xigay in la doorto madaxweynihii dowladda federaalka oo  isagu caleemo saartay ra'iisul wasaarihiisii waxaase xigay in xubnaha wasiiradda uu iyana soo xulo wasiirkii koowaad oo dabadeed ay dowladdii isu duba dhacdo qaabkee doontaba ha ahaatee.

Waxaa baarlamaankii loo soo raray xarun cusub waa magaaladda JOWHAR inkastoo ay jireen xubno isugu jiray hogaamiye kooxeedyaddii iyo qaar kaloo ka tirsanaa baarlamaanka ay iyagu ku sugnaayeen magaaladda Caasimadda ah ee Muqdisho oo xiligaas saldhigyo ay ku lahaayeen hogaamiyayaashaas oo sidoo kale xilal isugu jira wasiiro iyo xildhhibaano ka hayay dowladda.

Hadaba baarlamaankii Soomaaliyeed mala oran karaa xal bey u hayaan umadda Soomaaliyeed ? Mise la oran karaa sidoo kale wax bey qabteen tan iyo intii la soo dhisay, hadey qabteena maxaa kmida :-

Waxaan xasuustaa  mar marka qaar gabay xanuun badan oo qofkii dameer leh ka damqadda misana mas'uuliyiinta iyo madaxda dhiba dadkooda uu u mariyay abwaan Cabdi Muxumad tix kamida gabaygaas ayaa eheed anigoo gadaal idinkaga dhamaystiri doona Dhib baad nagu dul haysaan Eebbe dhagaxyo idin saar, Dhaamaantiin mid kama haro Aakhiro dhankeedana, Ilaah dhamac cadaabeed Dhinacyada idiin saar!!

Aniga iyo Kursigii dhiiga lahaa.


Hadaba aniga oo ka mid ahaa xubnihii baarlamaanka federaalka  ayaa waxaa mar walba i xanuujinayay dhibaatooyinkii ka soo taagnaa oo ilaa wali hadda sii socda misana sii laba jibaarsaday, waxaan mar walba maskaxdeeda weydiiyaa maxaan xilka umadda ugu qabanay aniga iyo kuwa ila midka ah, waxaa macquul ah in dadka qaarkii is yiraahdaan Cabdi dheeg oo xiligii kala guurka isaga baxay baarlamaanka ama dadka qaar u fasirtaan in ay la mid tahay qaababka iyo dhaqamadda looga bartay siyaasiyiinta ama mas'uuliyiinta qaar ee eedeeya meelaha ay boosaska ka waayaan ama u bogi waayaan.

Ma jirin awood aan ku joojin karay ama aan ku  doorin karay, colaaddihii socday, haa wey jirtay in aan ka mid ahaa xubnihii baarlamaan ahaan loo soo dhaariyay ee dhex fadhiyay kursiga dhiiga lahaa, nin walba iyo sababtuu uga mid noqday isagey quseysaaye anigu waxaa niyadeyda ku jirtay in aan ka mid noqdo ama aan ka dhex muuqdo baarlamaan hagaagsan oo umadda waddada nabadda u horseeda, balse rumoobi weysay riyadeedii hadii eed iyo dhaliil la ii soo jeediyana waa qasab in aan qaataa.

Runta in la sheego waxay noqotay dembi weyn oo aan lagu kicin, wixii qaladaada ah ee aad aragtana waa in aad ka aamustaa, Baarlamaan la mida baarlamaankeena wali anigu ma aanan maqlin umana malaynayo in diiwaanka keydka uu caalamka kaga jiro baarlamaan sidaa oo kala ah, Hogaan habowsan, xubno ay hurdo heyso, iyo kuwo hilmaansan hab dhaqanka ku salaysan mas'uuliyadda.

Waa Baarlamaan xor ah, waxa uu u adeegaa shacabka, waa xaruntii sharcidajinta, waa hogaankii iyo halkii laga hagayay dhamaan hey'adaha kala duwan ee dowladda, hadana waxaa meesha ka maqan oo aan muuqan wax qabashaddii baarlamaanka looga bartay, Baahi, Barakac, dilal, dagaalo, iyo duufaano colaadeed ayaa wali ku hareysay halka ay sal dhigteen Baarlamaanka, wuu jiraa xildhibaan ku xisaabtama mushaarka, wuu jiraa sidoo kale mid arimo kaloo isaga quseeya ku xisaabtama oo u jooga halkaa balse ma jiro mid ka hadlay wali dhibaatadda ka taagan dalka oo sii laba lixaadsatay markii baarlamaanku la dhisay.

Eeddaas kaliya  maahan ee waxaa kaloo daba yaal iyagoo afka qabsaday oo aashuunka ku addima ee aanan marnaba ka hadlin dhibaatadda dadweynaha iyo dhaqamadda dowladda, waxaana anigu oran lahaa intii waqti ka lumi lahaa waa in ay umadda u hiiliyaan oo ay garabkoodadda istaan intii laga helayo doorasho xor ah iyo dowlad xalaal ah.

Wax xal ah iima muuqdaan in ay umadda Soomaaliyeed u hayaan xubnaha baarlamaanka ee Baydhaba ku sugan, xalka kaliyana waa sidaan u soo sheegay oo ah in la helaa dowlad xalaal ah iyo waliba, baarlamaan iyo doorashooyin xor ah waxaanse leeyahay oon ku soo gaba gabaynayaa gabaygii uu mariyay abwaan Cabdi Muxumad Amiin.

Aamiin Aamiin …

Abdinasir Sa'eed Seyf ( Abdi Dheeg)
somalia@patriot.com