Xaflada Furitaanka Isbitaalka Ceelbuur

Monday, July 28, 2008 -  Waxaa maalintii shalay ahayd xaflad aad u balaaran lagu qabtay barxada isbitaalka Degmada Ceelbuur, taasoo ay ka soo qayb galeen dadweyne boqolaal gaaraya , xafladaas oo ahayd furitaanka isbitaalka guud ee Ceelbuur oo dhismahiisu socotay muddo hal sano ah, mashruuca isbitaalka Ceelbuur ayaa noqonaya kii ugu balaaraa ee deegaankaas laga hirgaliyo 18 sano ee la soo dhaafay, waxaa ka soo qayb galay qaybaha gala gedisan ee bulshada deegaanka Ceelbuur oo ay horkacayeen madaxda degmada , ururada bulshada , hogaamiyeyaal dhaqameedyo caanka ka ah deegaanka ,sida  Ugaas Cabdukhaadir ugaas Xaashi, iyo wakiilka Ugaas Ciise ugaas Maxamed, waxaa iyana Xaflada ka soo qayb galay Wufuud ka kala socotay degmooyinka Ceelgaras, wabxo iyo Galhareeri.
 

Ka soo qayb galayaasha ayaa halkaas ka jeediyay qudbooyin qiiro iyo xamaasad leh iyo waliba duco loo mariyay dadkii isku howlay dhismaha isbitaalka oo ah isbitaal ku filaan kara dadka deegaanka, kaasoo ay guud ahaan qarashkii ku baxay ay bixiyeen qurbajooga soomaaliyeed ee ku nool wadamada reer galbeedka.
 
Lamuun Maxamed Cabdikariim ayaa halkaas ka jeedisay taariikhdii isbitaalka iyo sababihii loo dhisay, iyadoo dadweynaha u sheegtay in mudo hal sano iyo bar ka hor ah, ay dumarka Degmada Ceelbuur lacag iska aruuriyeen ka dibna ay waceen dad ku nool dibadaha iyo gudaha oo ay islahaayeen dhibaatada caafimaad ee deegaanka ayay wax idinkala qaban karaan, ka gadaal markii ay dhowr dumar ah ay daryeel la,aan caafimaad ugu geeriyoodeen xiligii ay umulayeen kuwaasoo u badnaa gabdho ugub ah, codsiyadii aan dirsanay waxaa ka soo jawaabay soomaalida ku nool wadanka ingiriiska , gaar ahaan magaalada la yiraahdo Bolton  oo ah magaalo yar oo soomaalida ku nooli aad u tiro yar yihiin.

Intaa ka dibna waxaa iyana na taageeray, dad soomaliyeed oo ku nool wadamada Australia, Canada,Denmark,England, switzerland, iyo Maraykanka,  iyadoo meelihii kale oo aan wacnay aanan ka helin wax taageero, waxay dadwaynaha u sheegtay in labadii todobaad ee la soo dhaafay uu shaqaynaya qaybta dhalmada ee isbitaalka (maternity ward), taasoo beey tiri hada ay jiifaan dumar dhowr oo ku umulay maalmihii la soo dhaafay oo intooda badan laga keenay miyiga, sida aad la socotaan baahi bini,aadamka kama dhamaato, waxaa hada noogu daran  Umbulance, iyada waxaan rajeeynaynaa in dhowaan ay nasoo gaari doonto, waxaana noo balan qaaday walaalihii markii hore noo gaday Matoorka nalka ee isbitaalka, kuwaasoo ku nool Minisotta (USA).
 
Ismaaciil Xuseen(Ismaaciil dheere) oo ah madaxa mashruuca la soo gabagabeeyay ee isbitaalka ayaa isna ka warbixiyay qalabka yaal isbitaalka, isagoo sheegay in isbitaalka ay jiifan karaan 50 bukaan ah markiiba , sidoo kalena sheegay inaay jiraan qalab soo socda sida raajitada iyo shaybaarka iwm, dhamaan waxa aad u jeediin iyo waxaa soo socdaba waxaa laga dhisay jeebka dadka soomaliyeed ee ku nool wadamada ay walaasheey Lamuun sheegtay kuma jiraan wax la soo isticmaalay (second-hand), ama wax hay,ad ina siisay, kumana aanan tashanba, laakiin cid kasta oo na taageeraysa waan soo dhowaynaynaa.