Tuesday October 28, 2008 - Muqdisho: Maxamed Cusmaan Cali (Dhagaxtuur)  oo ahaa gudoomiye ku xigeenkii dhinaca arimaha dibada maamulkii xilka laga xayuubiyey ee gobolka banadir marna ahaa ku simaha gudoomiyaha oo shir jaraid ku qabtay maanta Magaalada Muqdisho ayaa ku faahfaahiyey qar ka mid ah dadkii lagu dilay dalka koofurta Africa iyo Magacyadooda isaga oo sheegayna in dayactir lagu sameystay umada somaliyeed.

 

Iyadoo ay weli sii socdaan dilalka iyo dhibaatooyinka kala duwan ee loo geysto shacabka Soomaaliyeed ee ku nool dalka Sauth Africa, ayaa waxaa maanta arrintaasi ka qeyliyay isla markaana ka hadlay Maxamed Cusmaan Cusmaan Cali (Dhagaxtuur) oo isagu si weyn uga hadlay tacadiyada muwaadiniinta Soomaaliyeed loogu geysto dalkaasi.

 

 

 

'Sauth Africa dhibaatada ay Soomaali ku heyso ma jirto adduunka meel ay ka dhacday' ayuu yiri Maxamed Cusmaan Cali (Dhagaxtuur) oo sheegay in jirka dadka Soomaaliyeed laga dhigto dayactir, isagoo Saxaafadda u soo bandhigay sawiro muwaadiniin Soomaaliyeed oo jirkooda ay ka muuqato dhaawacyo nin mindi lagu jeexay madaxa ilaa caloosha.

 

 

'Waxaan ka xumahay in dalka Sauth Afrika meeshii laga filayay inay nagu garab siiyaan sidii dalka Soomaaliya loo xasili lahaa, oo ciidamo u soo diri lahaayeen ama ay caawin lahaayeen dadka dhibaateysan ee Soomaaliyeed, waxay noogu bedeleen inay jirkeeda ka dhigtaan Isbeer baartis' ayuu yiri Maxamed Cusmaan Cali (Dhagaxtuur) oo sheegay in dowladda dalkaas aanay iyadu waxba ka qabaneynin arrintaas.

 

 Md Dhagaxtuur: 'IGAD  inkastoo ay waddo dadaal ummadda Soomaaliyeed lagu xaqiijinayo nabadgelyadeeda iyo arrimaha siyaasadda, waxaan dhihi lahaa ha iska fiiriso IGAD arrimaha Soomaaliya........'

 

'Dowladda Sauth Africa amnigeeda waa sugataa, bankiyadooda lama dhaco oo way ilaashadaan' ayuu yiri Maxamed Cusmaan Cali (Dhagaxtuur) oo sheegay in Dowladda Sauth Afrika aanay waxba ka qaban dhibaatada shacabka Soomaaliyeed loogu geysto dalkaas.

 

 

 

Waxa uu sheegay in lala xisaabtami doono mar kasta oo dalka Soomaaliya uu cagihiisa isku taagto, isagoo ammaanay doorka ay dalalka deriska ah ku leeyihiin shacabka Soomaaliyeed sidii ay u daryeeleen dadka qaxootiga ah ee dalalkooda tegay, isagoo qaar ka mid ah dadkii lagu dilay Sauth Africa ka hor akhriyay Suxufiyiinta, waana kuwan dadkii uu magacyadooda soo qaatay:-

 

 

Maxamed Cabdi Faarax 14-kii November 2006,

 

Marxuum Axmed Cusmaan Qayre oo 24-jir ah,

 

Saddex nin oo lagu gubay Dukaankooda, magacyadooda:

 

 

1. Yuusuf Yare

 

 

Maxamed Shaafi Sheekh  Xareed,

 

26-ki Sebtembar qoys Soomaali ah oo lagu dilay dalka Sauth Afrika, magacyada Qoyska:

 

Hooyo Saciido Aadan Maxamed

 

Ibraahim Shariif 14-sano jir

 

Maxamed Shariif 19-sano jir iyo

 

Gabar 12-jir ah

 

 

'Dalalka deriska nala ah, sida Kenya, Itoobiya iyo Jabuuti waxaan uga mahad celinayaa sidii ay u soo dhoweeyeen dadka Soomaaliyeed ee u qaxay dalalkooda' ayuu yiri Md. Dhagaxtuur, oo dhinaca kale sheegay in dalka Sauth Afrika uu noqday kawaanka muwaadiniinta Soomaaliyeed, isagoo tilmaamay in dalka Sauth Africa aanay u abaal gudin shacabka Soomaaliyeed oo iyagu garab istaagay una hiiliyay markii ay dalkaasi ka talinayeen cadaanka tirada yar.

 

Sidoo kale Maxamed Cusmaan Cali Dhagaxtuur waxa uu ka hadlay xaaladda arrimaha bulshada Soomaaliyeed ee xilligan ay ku sugan tahay, isagoona sheegay inuu u mahad celinayo ganacsatada Soomaaliyeed oo iyagu waxoogaa hoos u dhigay qiimaha ascaarta, wuxuuna ku booriyay inay hoos u sii dhigaan qiimaha raashinka iyo alaabooyinka kale.

 

 

'Waxaan ka codsanayaa hay'adaha samafalka maadaama la guda gelayo xilliga jiilaalka inay gargaar kala duwan la gaaraan qoysaska ku dhibaateysan dalka gudihiisa, gaar ahaan magaalada Muqdisho iyo daafaheeda, isagoo ugu baaqay sidoo kale inay jiraan goobo oo biyo la'aan ay ka jirto, isla markaana u baahan in ceelal loo qodo' ayuu yiri Md. Dhagaxtuur oo sheegay inuu cambaareynayo dilalka iyo ugaarsiga lagu hayo saraakiisha hay'adaha samafalka ee ka howlgala dalka.

 

'Dilalka iyo ugaarsiga lagu hayo saraakiisha hay'adaha samafalka aad iyo aad ayaan uga xumahay, waana cambaareyneynaa arrintaasi, waxaana soo jeedinayaa in Hay'adaha samafalka howlahooda loo madax banneeyo' ayuu yiri Maxamed Cusmaan Cali (Dhagaxtuur) oo hay'adaha samafalka ku wargeliyay inaysan dheg jalaq u siin kooxo ay sheegaan inay taleefanno u soo diraan.

 

Dhinaca kale Maxamed Cusmaan Cali (Dhagaxtuur) waxa uu ka hadlay xaaladda siyaasadda dalka, xilliga kala guurka, heshiiska Jabuuti iyo wicitaanka IGAD ee Dowladda KMG Soomaaliya, isagoo sheegay inuu soo dhoweynayo heshiiska ay dalka Jabuuti ku gaareen dowladda iyo Isbaheysiga dib u xoreynta, taasi oo uu ku tilmaamay inay tahay mid yididiilo leh oo shacabka Soomaaliyeedna qiimo weyn ugu fadhida.

 

 

'IGAD  inkastoo ay waddo dadaal ummadda Soomaaliyeed lagu xaqiijinayo nabadgelyadeeda iyo arrimaha siyaasadda, waxaan dhihi lahaa ha iska fiiriso IGAD arrimaha Soomaaliya, waayo dad badan talada Soomaaliya ka dhaxeysaa, waxaan soo jeedinayaa IGAD in iyadoo xal raadineysa inaysan sii fogeyn arrinta Soomaaliya oo ay si feejigan u gasho arrinta Soomaaliya' ayuu yiri Md. Dhagaxtuur oo sheegay inay jiraan dad kale oo ay quseyso arrinta Soomaaliya kuna sugan gudaha dalka.

 

Muuse Maxamuud Jiisow
musejisow@hotmail.com
Muqdisho Bakaaro Somalia
00252-1-5576666
00252-50-907666