May8, 2009 MUqdsho QOL) Kulan dag dag ah oo ay yeesheen golaha waziirada oo lagu gorfeeyay arimaha amaan ee Magaalada Muqdisho.

Golaha wasiirada ee DKMG ee Soomaaliya ayaa kulan deg deg ah ka yeeshay xaalada amaan ee magaalada Muqdisho, xilli uu dagaal shaley galab ku dhexmarey xoogaga Maxkamadaha iyo Al Shabab qeybo ka mid ah magaalada Muqdisho.

Kulanka oo ay albaaabadu u xirnaayeen waxaa shir gudoominayey raisul wasaare Cumar C/rashiid Cali Sharma’arke, iyadoo ay ka soo qeybgaleen dhamaan xubnaha goaha xukuumada.
Kulanka inkastoo aan wax go’aan ah laga soo saarin hadana waxaa si aad ah ay golaha wasiiradu u falanqeeyeen xaalada amaan ee magaalada iyo talaabooyinka ugu haboon ee lagu sugi karo amaanka Muqdisho oo hadda dowlada dhuun galyo ku noqdey. Xubno wasiiro ah oo kulanka ka hadlay ayaa soo bandhigey aragtiyo ay u arkaan in amaanka magaalada Muqdisho lagu sugi karo kuwaasi oo raisul wasaaraha loo gudbiyey.

Ilo ku dhow kulanka ayaa Saxaafada u sheegay in kulanka lagu soo hadalqaadey dagaalkii shaley dhexmarey xoogaga Maxkamadaha iyo Al Shabab ee ka dhacay wadada Warshadaha, waxana ay xubnaha wasiiradu tilmaameen dhamaan sida ay u bilaabi karaan talaabooyin amaan oo wax ku ool ah oo Muqdisho laga hirgaliyo.

Ma jirin wax war ah oo saxaafada kulanka laga siiyey, hase yeeshee waxaa lagu wadaa in kulamo kale ay yeeshaan golaha wasiirada iyadoo lala kaashanayo odayaasha iyo culimada si dowladu ay taageero ugu hesho ka adkaanta caqabadaha amaan eek u hor gudban.

Kulanka ayaa qeyb ka ah kulamo xiriir ah oo ay dowlada Sheekh Shariif ku dooneyso inay ku hanato nabadgelyada Xamar oo fariisin hadda xukuumada iyo barlamankuba u ah.