Saarkii Waraabe

August 19, 2012 | Filed under: Warka Maanta | Posted by:

Saarkan “Waraabe” waxaan curiyey ka dib, markii ay soo shaac baxday, Arrintii ahayd  in Goboladaa Jubooyinka laga bilaabay cunista iyo ugaadhsiga Waraabaha.

Arrintan oo Ugub ah oo ku cusub Geyiga Soomaaliyeed iyo maqalka dhegaha Ummadda Soomaaliyeedba, ayaa waxaa soo baxay guux badan bulshada dhexdeeda ah  muujiyeyna in laga biyo diiday ,, Sidaa awgeed ma jirto baahi inagu kelifaysa inaan cuno hilibka Waraabha ama Habardugaag dhan, Haddaan Soomaali nahay,waxaan leenahay xeebta ugu dheer  Afrika oo Kaluun(Malaay) nooc walba ku jiro, waxaan nahay wadanka ugu xoolaha badan Afrika waxaan haysaa meesiyo xoola ah oo kala duwan  sida: Geela , lo’da , Adhiga, Digaaga, waxaan leenahay Ugaadh badan , Sida : Geriga, Biciidka, Lo’kisida, Garanuugta, Goodirka, Cawsha, Deerada, Sakaarada, Goroyadaiyo Digiirinka iqb sidda awgeed maadaama, bad iyo beri iyo webi mid walba aan ka helayno Hilib  nagu fillan u malayn maayo inay jirayso ama daruuri ay noqonayso inaan cuno, Xayawaan aan hore loo cuni jirin, haddaba waraabihii oo arrintaas laftiisu ka murugaysan ayaa Saarkan tiriyey ee ka bogasho wacan:

 

 

 

 Saarkii Waraabe

 

Aduunyadu waa wacaal

War iyo waydiimo wada

Waaga kuu soo beryaba

Wax uunbaa laga dhaxlaa

Duruus buu kuu wadaa

Waqtigu oo laga bartaa

Waxsheegiyo waana iyo

Wacyigelin baan wadaa

Bal weedhaydaa dhugtoo

Ku weeleeyoo cindiga

Qalbiga wehel uga dhigo

Walaal dhegihiina fura

 

Wawgii kale waxaan lahaa

Waraabe doodayoo

Waraaqo dacwa qoroo

Wadaadada diinta iyo

Waageerkaa madaxda iyo

Wasaaradaheena iyo

Wakiillada dunida iyo

Waqooyi bari u diray

 

Wuxuu yidhi weerarba

Dadku igu waalayoo

Waa lay waaxyeynaya

Sidii weedhaan laxdii

Wankeedii baan noqdoo

Warmaa lay wada sitaa

Waraaq baa igu dhacoo

Washaaqaa igu furmayo

Waxaan ahay magan Islaam

 

Wawgii kale waxaan lahaa

Waraabe doodayoo

Waraaqo dacwa qoroo

Wadaadada diinta iyo

Waageerkaa madaxda iyo

Wasaaradaheena iyo

Wakiilada dunida iyo

Waqooyi bari u diray

 

Wuxuu yidhi weerihii

Waraabe iyo Dhurwaa

Walow Mukulaal ku tahay

Weligood maysan jirin

Islaam walaqyada jaroo

Wacdina ku bannaysta

Wadnaha kala soo baxee

Maxaa wacay maanta oo

Walaaloow laygu galay?.

 

 

Wawgii kale waxaan lahaa

Waraabe doodayoo

Waraaqo dacwa qoroo

Wadaadada diinta iyo

Waageerkaa madaxda iyo

Wasaaradaheena iyo

Wakiilada dunida iyo

Waqooyi bari u diray

 

Wuxuu yidhi waa la yaab

Adoo waayeel hashii

Sacii waydaar ahaa

Wankaagii woodhaqa ah

Riyaha waaxyeysan kara

Ugaadhuna weel ku shuban

Waraabe maxaad ku fali?

 

Wawgii kale waxaan lahaa

Waraabe doodayoo

Waraaqo dacwa qoroo

Wadaadada diinta iyo

Waageerkaa madaxda iyo

Wasaaradaheena iyo

Wakiilada dunida iyo

Waqooyi bari u diray

 

Wuxuu yidhi wiil Dhurwaa

Waryaa Soomaaliyeey

Haddaad wadankii gubteen

Haddaad xaqa weeciseen

Haddaad wehelkii disheen

Walaalkiin iibsateen

Waabayo walaaqaysaan

Waraabe cun aad tihiin

Wacdaraha aad dhigteen

Wax sheega aduun ma jiro!

 

Wawgii kale waxaan lahaa

Waraabe doodayoo

Waraaqo dacwa qoroo

Wadaadada diinta iyo

Waageerkaa madaxda iyo

Wasaaradaheena iyo

Wakiilada dunida iyo

Waqooyi bari u diray

 

Ninkii waran kugu ganee

Wadnaha dacalkiisa muda

Waxaa abid kaaga daran

Midkii warwareejiyee

Warxuma kugu sii dilee

Wadaadka waa sax iyo

Xalaal la wareegayoo

Wallee hoog baad dhigteen.

 

Wawgii kale waxaan lahaa

Waraabe doodayoo

Waraaqo dacwa qoroo

Wadaadada diinta iyo

Waageerkaa madaxda iyo

Wasaaradaheena iyo

Wakiilada dunida iyo

Waqooyi bari u diray

 

Wuxuu yidhi weerarkani

Aduunya wareegtayoo

Aakhiro weydaaratoo

Samaanta ka weecatoo

Xumaanta ku waalanbaa

Waqtigu nagu soo simee

Wehelkii Soomaaliyeed

Wadanka aan wada lahayn

Maxay nagu weerareen

Wadnaha noo goynayaan?.

 

Wawgii kale waxaan lahaa

Waraabe doodayoo

Waraaqo dacwa qoroo

Wadaadada diinta iyo

Waageerkaa madaxda iyo

Wasaaradaheena iyo

Wakiilada dunida iyo

Waqooyi bari u diray

 

Wuxuu yidhi waagi hore

Waraabe haddaan ahaa

Baadida aan walamsan jiray

Xoolaha waaxyaha ka jara

Nimaan waxba reebanoo

Habeenkii weerar gala

Waxshiya oo aan xishoon

Waxaa iga daran Shabaab

Waraabe hadday cuneen!

 

Wawgii kale waxaan lahaa

Waraabe doodayoo

Waraaqo dacwa qoroo

Wadaadada diinta iyo

Waageerkaa madaxda iyo

Wasaaradaheena iyo

Wakiilada dunida iyo

Waqooyi bari u diray

 

Wuxuu yidhi macallinkii

Wacdigii mariyee aqriyey

Waraabuhu waa dawoo

Ninkii wadnihiisa liqa

Waslad hilibkiisa cuna

Fuudkiisa waraaba abid

Wuxuu noqon Maalikoo

Wedkuna dili maayo abid

Waayeelnimo kala tagoo

Wuxuu ku dhex waarayaa

Wareegta aduunyadee

Siduu u wanjalay bal daya!

 

Wawgii kale waxaan lahaa

Waraabe doodayoo

Waraaqo dacwa qoroo

Wadaadada diinta iyo

Waageerkaa madaxda iyo

Wasaaradaheena iyo

Wakiilada dunida iyo

Waqooyi bari u diray

 

Kitaabka wanaagsan

Xadiisku ma warininoo

Wadaadii hore ma qabin

Waraabuhu waa xalaal

Waxaa dhigay waallidaa

Wareershay adduunyadii

Shabaab wiilkii la baxay

Warjaafkii noo yimide

Wacdiga beena ah wadoow

Waraabihii wuu baxayoo

Wadanka ka dhoofyaye

Wixii ku hadhay u taal.

 


Cabdiraxiin Hilowle Galayr |  Galayr1977@hotmail.com

________________________________________________________________

Share on Facebook

Other Interesting posts:

Posted by on August 19, 2012. Filed under Warka Maanta. You can follow any responses to this entry through the RSS 2.0. Responses are currently closed, but you can trackback from your own site.

You must be logged in to post a comment Login