Shuruudaha laga rabo musharaxiinta u taagan xilka Gudoomiyaha Baarlamaanka!

August 23, 2012 | Filed under: Warka Maanta | Posted by: QOL Admin

Gudiga doorashada baarlamaanka cusub oo shalay isu qeybiyay Gudiyo ka shaqeeya howlaha doorashada ayaa sheegay in maanta oo taariikhda tahay 23-ka Agosto ay bilaabaneyso diiwaan gelinta musharaxiinta u taagan xilka Gudoomiyaha Baarlamaanka iyo kuxigeenadiisa.

Afhayeenka Gudiga doorashada Cusmaan Libaax ayaa sheeegay in shuraadaha laga rabo musharaxiinta ay tahay inay soo gudbiyaan araajidooda maanta 9-ka subaxnimo ilaa 2-duhurnimo.

“Musharaxiinta waxaa laga rabaa inay araajidooda soo gudbiyaan labada maalmood ee taariikhda tahay 23-24, saacada marka ay tahay 9-ka subaxnimo ilaa 2-da duhurnimo, waxay keenayaan araajidooda hoolka VIB-da garoonka diyaaradaha”ayuu yiri Cusmaan Libaax.

Sidoo kale waxaa uu xusay in shuruudaha laga rabo musharaxa ay tahay mid Gudiga isla gartay, isla markaana musharax walba uu soo gudbiyo File ka kooban codsi iyo labo sawir iyo CV-ga iyo lacagta diiwaan gelinta.
Shuruudaha ayaa waxay kala yihiin:-

In musharaxa u tartamaya xilka afhayeenka iyo labada ku xigeen ay yihiin xildhibaano baarlamaanka ka tirsan.
In musharax kasta uu soo gudbiyo codsi qoraal ah oo wata labo sawir oo midab leh.
In musharaxa uu soo cadeeyo jagada uu doonayo inay tahay afhayeenka ama inay tahay ku xigeenada.
In musharax kasta uu iska bixiyo lacag diiwaangelin ah oo gaareysa sidan:
- Jagada Afhayeenka = $3,000 (Saddex kun doolar) –
- Jagada gudoomiye ku xigeenka 1aad = $2,000 (Labo kun doolar)
- Jagada gudoomiye ku xigeenka 2aad = $1,000 (Kun doolar).