Kulan arimaha gargaarka oo Muqdisho lagu qabanayo

Kulan looga hadlayay sidii loo kordhin lahaa dhaqaalaha lagu gargaarayo Howlaha bani’aadaninimada Soomaaliya ayaa maanta lagu qabtay Magaalada Muqdisho, waxaana kulanka kasoo qeybgalay Masuuliyiin ka tirsan Dowladda Federaalka ee Soomaaliya uu kamid yahay wasiirka arrimaha Gudaha iyo Amniga qaranka C/kariim Xuseen Guuleed iyo Masuuliyiin ka socota Laamaha gargaarka u qaabilsan qaramada Midoobay.

Stefano Porretti oo ah ku-simaha isu-duwaha gar-gaarka bini-aadanimo QM ee Soomaaliya, ayaa kulankaasi ka sheegay in Soomaaliya ay haatan u baahantahay Lacag dhan 1.3 Biliyan oo Dollar si loo caawiyo 3.8 Malyuun oo Barakacayaal Soomaali ah isalamrkaana u baahan in ay helaan gargaar bani’aadaninimo oo degdeg ah Saddexda Sano ee soo socota.

Wasiirka arrimaha Gudaha iyo Amniga Qaranka C/kariim Xuseen Guuleed ayaa dhankiisa xusay in Soomaaliya ay weli ka jirto dhibaatooyin farabadan oo heysta dadka barakacayaasha ah isagoo ka dalbaday hay’adaha gargaarka ka shaqeeya inay u gurmadaan waxa uuna beesha caalamka ka codsaday wasiirku inay si hagar la’aan ah u gacan qabtaan dadka dhibaateysan ee ku jira xerooyinka qaxootiga iyo kuwa barakacayaasha.

Waa kulankii ugu horreeyay ee dhaqaale lagu dalbanayo islamarkaana Magaalada Muqdisho ku dhex mara wasiirka Amniga Qaranka iyo Arrimaha Gudaha iyo Masuuliyiin ka socota Hay’adaha Qaramada Midoobay u qaabilsan gargaarka.

Share on Facebook

Other Interesting posts:

Posted by on December 5, 2012. Filed under Warka Maanta. You can follow any responses to this entry through the RSS 2.0. Responses are currently closed, but you can trackback from your own site.