Hay’adda TIKA oo dib u dhis ku sameynayso waddooyinka magaalada Muqdisho

Afhayeenka Maamulka  Gobolka Banaadir Maxamed Yuusuf oo maanta warbaahinta lahadlay ayaa sheegay in hay’adda TIKA ee laga leeyahay dalka Turkiga  ay hadda waddo qorshe ay ku dar dar gelineyso dayactirka iyo hagaajinta wadooyinka magaalada Muqdisho, iyadoo uu sheegay in dayactirkaasi uu ka bilaaban doono meelaha ku dhow garoonka diyaaradaha ee Muqdisho, halkaasoo ay burburiyeen roobabkii ugu dambeeyay ee Muqdisho ka da’ay iyo bullaacado ku yaalla degmada Yaaqshiid.

“Hay’adda TIKA waxay billowday inay dib u dhis ku sameynayso marsha-biyeedka wadadda isku xirta garoonka diyaaradaha ee Muqdisho iyo madaxtooyada, waxayna sidoo kale dayactir ku sameynaysaa biyo fariisin ku yaalla inta u dhexeysa KM-4 iyo garoonka diyaaradaha Muqdisho,” ayuu yiri Maxamed Yuusuf.

Sidoo kale, afhayeenka maamulka gobolka Banaadir wuxuu sheegay in haya’ddu ay degmada Yaaqshiid ka waddo sameynta bullaacado ay biyuhu maraan oo aan wax dayactir ah helin 20-kii sano ee u dambeysay, isagoo xusay in sannadka soo socda si rasmi ah loo billaabi doono dhismaha waddooyinka Muqdisho.

“Muqdisho waxay la mataanowday magaalada Istabuul ee dalka Turkiga, waxaana ay dowladda Turkigu ballaanqaaday inay dib u dhis ku sameynayso caasimadda Soomaaliya, gaar ahaan waddooyinka gaaraya 36-km, bullaacadaha biyaha qaada iyo weliba marsha-biyoodyada ay dadku maraan,” ayuu yiri afhayeenka maamulka gobolka Banaadir.

Hadalka afhayeenka gobolka Banaadir ayaa imaanaya iyadoo madaxweynaha dalka Turkiga, Cabdalla Gul uu sheegay maalin ka hor in dowalddiisu gacan ka geysanayso sidii dib loogu dhisi lahaa Soomaaliya.

.

XafiiskaWararka | Qaranimo Online | Muqdisho, Soomaaliya

______________________________________

Share on Facebook

Other Interesting posts:

Posted by on December 7, 2012. Filed under Warka Maanta. You can follow any responses to this entry through the RSS 2.0. Responses are currently closed, but you can trackback from your own site.