Muqdishow Nasiibkeed, Maantuu u wacanyahay (MAANSO)
Waxaan qoray Tixdan Maanso ee aan ugu magac daray Muqdishow Nasiibkeed, Maantuu u wacanyahay, Goor habeen ah, anigoo Maraya mid ka mida Wadooyinka Caasimadda.
Halkan ayaan ku dhashay kunasoo barbaaray, waxaana iminka ii muuqanaya wax aad uga duwan wixii aan Magaalada kusoo bartay ee ahaa inaanay Dadku ku dhiiran karayn socod Habeennimo, Colaadihii jiri jiray awgood.
Sidaas darteed baan u jecleystay inaan wax un ugu darsado Sheekooyinka wanaagsan ee ay Dhawaanahan Dalka iyo Xaalkiisa Maanta ka sheegayeen Af-Maalka Soomaaliyeed iyo inta kale ee ka hadashay oo Caalamka ahba.
Waa tanaa Tixdii ee Aqris wacan:
- Muqdishaa la oran jiray
- Waa Makaanki Dhalashiyo
- Meeshi aan kusoo koray
- Wali Magaci baa jira
- Muuquse ka duwan sidi
- Maalmo horeba la ogaa
- Maantiyo Sideey tahay
- Magaaladiyo Xaalkeed
- Maaha Shalay wixii jiray
- Marqaatina waxaa u ah
- Maalin maaha iminkoo
- Waa Habeen mugdi ahoo
- Mir-dhexaad la joogo
- Muqdishaan ku suganahay
- Halkii Maalmo tagay iyo
- Mudo badan Colaaduhu
- Marti-galin jireen baan
- Iyadoo Maqsuudoo
- Nabad Caano maashay
- Haatan meel la joogaa
- Markii hore Habeenkii
- Mugdigoon imaanoo
- Gabalkiiba muuqdeey
- Muqdishow Albaabada
- Mar quraa xirxiran jidhay
- Maqribkoo la adamayo
- Masjid looma kici jidhin
- Maqsinkiyo Qolkiisuu
- Mid kastaba ku tukan jiray
- Maafiyada Tuugta ah
- Ayaa miririqleyn jidhay
- Midkii ay arkaanna
- Mindi Dheer ku suri jiray
- Maryahana ka furan jiray
- Maantase waxaa yimi
- Miisaanka Dhuxushiyo
- Maanabooliyada Shibis
- Iyo Makaanka Siinaay
- Inta socod kusoo maro
- Xarar-yaale baal maro
- Madiiniyo dhankaa shishe
- Macmacaanka Ruux jira
- Mar kalaan oranayaa
- Muqdishoo Aleeyl Dumay
- Ama Maalin dhalaalkeed
- Midna aanu mid doorin
- Dadku Murug la’aantood
- Howsha maamulaayaan
- Mucjiso weeye maan oran?
- Ma dadaal la galay iyo
- Nabad lagu maqnaayoo
- Midig lagu haleelaa
- Micnuhuba noqonayaa?
- Mise waa la daaloo
- Shacabkoo madfaca nacay
- Iyo Dowladdoo maciinsatay
- Ayaa Guusha Makaniyay
- Colaadii Madaxa jaray
- Nabadana dib u milkiyay?
- Mid kastooy ahaataba
- Muqdishow Nasiibkeed
- Maantuu u wacan yahay
- Deyr bay mareysaa
- Xumihii iska meyrtay
- Ilaah baa Mahadaas leh
.
.
Mohamed Abdullahi Dhaaley
W/ CURIYAY: Mohamed Abdullahi Dhaaley
Mohammed_dhaley@hotmail.com
________________________________
Share on FacebookOther Interesting posts:
Posted by Abdiyare
on January 29, 2013. Filed under Faalooyinka, Warka Maanta.
You can follow any responses to this entry through the RSS 2.0.
Responses are currently closed, but you can trackback from your own site.
 |
 |
Socialize