Wasaarada Waxbarashada Soomaalia Oo Kajawaabtay Hadal Dhawaan Ka Sooyeeray Kooxada Al-Shabaab

____________________________________________________________________________

Muqdisho | Abriil 22, 2017 –Wasiirka Waxbarashada iyo Tacliinta Sare C/raxmaan Dahir Cusmaan ayaa ka jawaabay hadal ka soo baxay Al-Shabaab, kaasoo ay uga digayaan Waalidiinta Soomaaliyeed in aanay carruurtooda u dirin Iskuulada iyo Jaamacadaha aan Islaamiga aheyn.

Wasiirka ayaa sheegay in hadalka Al-Shabaab aanay waxba ka jirin, isagoo xusay in Manaahijta Soomaalida uu ku saleysan yahay dhaqanka Islaamka iyo midka Soomaaliga.

“Soomaalida manhajkeeda wuxuu ku saleysan yahay Islaamnimo iyo Soomaalinimo, caqiiqadada iyo aragtida Islaamka ay ka turjumeyso”ayuu yiri Wasiirka Waxbarashada oo u waramayay Idaacada VOA.

Waxaa uu ugu baaqay in aysan Waalidiinta dheg jalaq u siin Al-Shabaab, waxaana uu xusay in iskuulada lagu dhigo Tarbiyada Islaamka iyo luqada Carabiga.

“Cid walba waa ogtahay, waalidiinta Soomaalida waa loo sheegaa, in waxyaabaha lagu dhigo Iskuulada, sida Fasalka Koowaad illaa 12aad in Tarbiyada Islaamiga lagu dhigo”ayuu yiri Wasiirka.

Hadal ka soo baxay Afhayeenka Al-Shabaab ayaa waxaa uu uga digay Waalidiinta inay ilmahooda u diraan Iskuulada iyo Jaamacado uu sheegay in lagu faafinayo waxbarashada reer galbeedka, isagoo u digay iskuulada iyo jaamacadaha.

W/Q:-BASHIIR BARRE ALI

Xafiiska Wararka Qaranimo Online | Muqdisho

_______________________________

_____________________________________________________________________________________