![](https://www.qaranimo.com/wp-content/uploads/2014/10/anz-ad-for-qol-anim.gif)
Maxkamadda Cadaaladda Adduunka ee magaceeda loo soo gaabiyo ICJ, ayaa maanta dhageysaneysa kiis ka dhan ah Israa’iill oo ku saabsan dagaalka Qasa iyo duqeymaha Israa’iil ku hayso Falastiiniyiinta.
Dowladda koonfur Afrika ayaa gudbisay dacwaddaan waxaana ay ka dalbatay maxkamadda in ay ka baaraan degto go’aanka laga gaarayo arrintaan. Balse Israa’iil ayaa si adag u diiday eedaymaha loo jeediyay.
Garsoorayaasha maxkamadda ayaa ee go’aanka ka gaari doona kiiska dacwadaan ayaa waxaa kamid ah Cabdulqawi Axmed, oo ah nin Soomaaliyeed oo horay u ahaan jiray guduumiyaha maxkamadaan.
![](https://www.qaranimo.com/wp-content/uploads/2024/01/garsoore-cabdulqawi-620x349.jpg)
Waa kuma Cabdulqawi Axmed Yuusuf?
Cabdulqawi Axmed Yuusuf – waa xubin ka tirsan garsoorayaasha maxkamadda ICJ, isaga oo xilka madaxwaynaha maxkamadda ICJ ka degay bishii February ee sannadkii 2021, sida lagu daabacay bogga ICJ.
Ka hor inta uusan xilka madaxweynaha qaban waxa uu xilal kala duwan ka soo qabtay hay’adaha caalamiga ah iyo ururada caalamiga ah ee Vienna, Geneva iyo New York. Sida laga soo xigtay machadka Genava Graduate Institute.
Cabdulqawi ayaa horey waxaa uu la taliye dhanka sharciga ah uga soo noqday qaar ka mid ah hay’adaha Qaramada Midoobey sida UNESCO and UNIDO . Dalalka uu wax ku soo bartay waxaa ka mid ah Soomaaliya, halkaasi oo sidoo kale uu bare ka noqday Jaamacaddii Umadda.
![](https://www.qaranimo.com/wp-content/uploads/2024/01/icj-620x349.jpg)
Dr. Cabdiqawi, waxaa uu xubin ka ahaa garsoorayaasha maxkamadda tan iyo 2009-kii, isaga oo madaxweyne ku-xigeen ahaa tan iyo 6 February 2015-kii.
Cabdulqawi Axmed Yuusuf wuxuu rabay inuu noqdo dhakhtar. Nasiib darro, ma jirin xilligaasi Muqdisho dugsiyo lagu barto caafimaadka, taasoo keentay inuu halkiisa ka qaato shahaado dhanka sharciga ah. Sida lagu daabacay Geneva Graduate School.
Garsoore Cabdiqawi waxaa uu ku dhashay degmada Eyl ee gobolka Nugaal ee Soomaaliya bishii September 12 keedii, 1948-dii, waxaa uu wax ku bartay Jaamacadda umadda sanadkii1973, sidoo kale wuxuu ku biiray Hague Academy of International Law sanadkii 1974. Jaamacadda University of Florence, Italy ayaa sidoo kale la sheegay inuu waxbarashadiisa qayb kamid ah ku qaatay sanadihii 1976-1977.
Wuxuu ka mid ahaa 15 garsoore oo go’aan ka gaaray go’aankii dacwadda badda ee Soomaaliya iyo Kenya.
Ka hor go’aankaas Kenya ayaa ku eedeysay inuu horey Soomaaliya u soo mateley, ayna ka soo horjeedaan inuu ka mid noqdo garsooreyaasha go’aanka ka gaaraya kiiska badda ee Soomaaliya iyo Kenya.
Bayaan ay markaas soo sartay wasaarada arrimaha dibadda ee Kenya ayaa lagu sheegay in Kenya ay u aragto in maxkamada aysan ahayn mid si xaq ah u qaadaysa kiiska muranka badda.
Dowoladda Kenya waxay dhanka kale ku dooday in garsoore Cabdulqawi uu horey Soomaaliya ugu matalay shirkii caalamiga ahaa ee Qaramada Midoobey ee looga hadlayay arrimaha shuruucda badda.
Waa garsoorihii Soomaaliyeed ee ugu horeeyey ee darajo illaa heerkaas ah ka gaara heyadaha cadaalada ee caalamiga ah.
Cabdulqawi ayaa ah aasaasaha iyo tifaftiraha African Yearbook of International Law
Waxa uu wax badan ka qoray badan sharciga caalamiga ah, wuxuuna haystaa haystaa shahaadada PhD oo ka diyaariyay Sharciga caalamiga ah ee IUHEI, Geneva.
Wuxuu barre dhinaca sharciga ah ka ahaa jaamacadii Umadda ee magaalada Muqdisho intii u dhaxeysay sanadihii 1974-1980 , kadibna wuxuu macalin ka noqday Jaamacadda Geneva, Sida ay Jaamacaddu Boggeeda ku daabacday.
Waxa uu ahaa wakiilkii Soomaaliya u fadhiyay shirweynihii saddexaad ee Qarammada Midoobay ee sharciga badaha (1975-1981).
Wuxuu sidoo kale ka mid ahaa Ergadii Soomaaliyeed ee Guddiga La-tashiga Sharciga ee Afro-Asian (1975 iyo 1976).
Dhanka kale wuxuu Xubin ka ahaa wafdi Soomaaliyeed oo ka qeyb galay shir madaxeedkii Ururka Midowga Afrika ee (1974).
.
Xigasho: BBC Somalia
.
_____________________________________________________________________________________Xafiiska Wararka Qaranimo Online | Mogadishu, Somalia
_____________________________________________________________________________________Advertisement
_____________________________________________________________________________________![](https://www.qaranimo.com/wp-content/uploads/2014/10/anz-ad-for-qol-anim.gif)
![](https://www.qaranimo.com/wp-content/uploads/2019/06/horseedsc.jpg)