Qaar ka mid ah dadkii xooga ku galay Congress-ka Maraykanka oo lasoo qabtay

____________________________________________________________________________

January 11, 2021

Laba nin oo ka mid ahaa dadki ugu caansanaa ee Arbacadi xoogga ku galay xarunta Koongareeska Mareykanka ayaa Sabtidi la xiray, iyada oo ay ciidamada amaamnka baadi-goobayaan kuwo kale oo badan.

Labada nin ayaa ka mid ahaa kuwii ay sida gaar ah u qabteen indhaha caalamka, sawirradoodana aad loogu wadaagay baraha bulshada.

Jacob Anthony Chansley oo kasoo jeeda gobolka Arizona ayaa Sabtidi lagu qabtay isla Arizona. Ninkaan ayaa ah ninki xirnaa koofi maqaar laga sameeyay oo geeso dhaadheer lagu dhajiyay.

Chansley oo ku magac dheer Jake Angeli, ayaa wajahaya dacwado ay ka mid yihiin ka qeybgaladi qarbudaad iyo dhaqan-xumo.

Ninka kale ayaa ah Adam Johnson ah 36 jir, kana soo jeeda gobolka Florida. Sawirkiisa ayaa kasoo muuqday baraha bulshada iyo telefashinnada isaga oo wata minbarka afhayeenka Aqalka Wakiillada Nancy Pelosi.

Adam ayaa laga soo xiray Sabtidi Kowntiga Pinellas, waxaana la filayaa in dhawaan maxkamad lasoo taago.

Jimcihi ayaa isna lasoo xiray, Richard Barnett oo kasoo jeeda gobolka Arkansas. Ninkaan ayaa lasoo sawiray isaga oo ku fadhiya kursiga xafiiska Afhayeenka Aqalka Wakiillada Nancy Pelosi, si jees-jees ahna ay lugtiisa u saaray miiska afhayeenka.

_____________________________________________________________________________________