Isniin: January 23 2023
Burkina Faso ayaa weydiisatay France inay ciidankeeda dalkaas ugala baxdo muddo bil gudaheed ah, sida ku cad warqad diblomaasi oo mas’uuliyiinta ay u direen Paris, taasi oo ay heshay wakaaladda wararka AFP.
Madaxweyne Emmanuel Macron ayaa Axaddii sheegay in Paris ay sharaxaad ka sugeyso Burkina Faso kadib markii militariga xukuma dalka ay sheegeen inay doonayaan in ciidamada Faransiiska ay ku baxan bil gudaheed.
Macron ayaa ku baaqay “taxaddar badan” isaga oo sheegay inuu jiray “jahwareer badan” oo ku saabsan hadallo ay warbaabinta sheegeen inuu jeediyey hoggaamiyaha militariga Ibrahim Traore.
“Waxaan sharaxaad ka sugeynaa Mr Traore,” ayuu Macron u sheegay wariyeyaasha.
Warqad kasoo baxday wasaaradda arrimaha dibedda, oo ku taariikheysan Arbacadii, ayaa soo afjareysaa heshiikii 2018 ee ciidamada Faransiiska lagu geeyey halkaas, waxayna u qabatay muddo bil ah bixitaankooda.
AFP ayaa warqadda ka heshay ilo-diblomaasiyadeed oo Burkina Faso ah, kuwaas oo aan xaqiijin in Faransiiska ay qireen helitaanka warqadda iyo in kale.
Mar wax laga weydiiyey warqadda, xafiiska madaxweynaha Faransiiska ayaa sheegay inay weli sugayaan xaqiijinta mowqifka Burkina Faso.
Wakaaladda Wararka Burkina Faso ayaa Sabtidii werisay faah-faahinta codsiga, islamarkaana ilo-wareedyo ku dhow dowladda ayaa u xaqiijiyey AFP.
Ilo-wareedka ayaa sheegay in tani aysan ka dhigneyn “in xiriirka loo jarayo Faransiiska balse wargelinta ay quseyso kaliya soo afjaridda iskaashiga militariga.”
Faransiiska ayaa waxaa Burkina Faso ka jooga 400 oo askari si ay ula dagaalamaan jihaadiyiinta, hase yeeshee xiriirka labada dal ayaa xumaaday bilihii dhowaa.
Tan iyo markii militariga ay xukunka qabsadeen September, waxaa jiray dibadbaxyo dhowr ah oo ku baaqaya inay dalka ka baxaan safiirka iyo ciidamada Faransiiska.
Waxaa jira astaamo muujinaya in Burkina Faso, ay si la mid ah dalka deriska la ah ee Mali, ay u weecanayaan iskaashiga Ruushka.
AFP
Office Nairobi Kenya
_____________________________________________________________________________________Xafiiska Wararka Qaranimo Online | Mogadishu, Somalia
_____________________________________________________________________________________Advertisement
_____________________________________________________________________________________
|
|
|
|
