Muqdisho,8 March 2016: Yuusuf Xuseen Jimcaale oo ah Duqa magaalada Muqdisho ayaa la kulmay Shaqaalaha dowladda Hoose qeybta mushaarka ku qaata lacagta Shiling Soomaaliga, kuwaasoo uu ugu baaqay inay laba-laabaan howlahooda.
Kulankan oo ka dhacay Aqalka dowladda Hoose ayaa looga hadlay howlaha nadaafada iyo bilic soo celinta, iyadoo ay ka dhex muuqdeen Haweenka ka shaqeeya nadaafada Jidadka Muqdisho.
Guddoomiyaha Gobolka Banaadir ayaa ku ammaanay shaqaalaha dowladda Hoose howlaha baaxada leh ee ay hayaan, waxaana uu xusay in maamulkiisa uu ku dadaali doono mar walba sidii ay u heli lahaayeen xuquuqdooda.
Waxaa uu sheegay inay muhiim tahay in laga shaqeeyo amniga, nadaafada iyo soo celinta bilicda magaalada Muqdisho.
Shaqaalaha dowladda hoose ayaa isugu jira kuwo mushaar ahaan u qaata lacagta Shiling Soomaaliga iyo Doolarka, iyadoo ay ku kala sareeyaan howlaha ay kala hayaan marki loo fiiriyo tayadooda.
_____________________________________________________________________________________Xafiiska Wararka Qaranimo Online | Mogadishu, Somalia
_____________________________________________________________________________________